I.2.1.3. PROGRAMAS DE GARANTÍA SOCIAL

Coa implantación da L.O.X.S.E. en 1990 aparecen os Programas de Garantía Social, considerados, na actualidade polo Plan Galego de Formación Profesional como unha parte importante da Formación Profesional Regrada. Estos programas teñen como finalidade ofrecer unha formación básica e profesional ó alumnado que non acadou os obxectivos da Ensinanza Secundaria Obrigatoria, de modo que poidan incorporarse á vida activa ou acceder á Formación Profesional Específica de Grao Medio previa realización dunha proba de acceso (Ver Cadro 1).

Os Programas de Garantía Social están destinados a menores de 21 anos e maiores de 16 (ou que os cumpran no ano natural da súa incorporación ó programa), que se atopen nalgunha destas situacións:

• Estar escolarizados no Segundo Ciclo da Educación Secundaria Obrigatoria e a pesar de ter accedido a un programa de diversificación curricular non estar en condicións de acadar os obxectivos marcados para superar a Educación Secundaria Obrigatoria. Tamén poden acceder os que non poideron acceder a un programa de diversificación curricular e se considera que están en perigo de abandono escolar.
• Estar desescolarizados e non posuír titulación académica superior á do Graduado Escolar ou tendo acadado esa titulación, carecer do título de Formación Profesional de Primeiro Grao.

Dentro dos Programas de Garantía Social podemos atopar dúas modalidades:

• Programas de Formación Educativa e Profesional: Estos programas son aqueles que se desenvolven íntegramente nun centro educativo no que se impartan ensinanzas de Formación Profesional, Ensinanzas de Educación Secundaria, Ensinanzas Artísticas, en centros de Educación de Adultos ou en centros de Educación Especial.
• Programas de Iniciación Profesional: Estos programas son aqueles nos que a Área de Formación Básica se desenvolve nun centro educativo dos indicados no punto anterior e a de Formación Profesional en colaboración con entidades da Administración Local, Institucións públicas ou privadas sen ánimo de lucro ou empresas coas que previamente a Consellería de Educación e Ordenación Universitaria estableza convenios de desenvolvemento de Programas de Garantía Social.
• Programas que na súa totalidade se desenvolven en Entidades da Administración Local e Institucións públicas e privadas sen ánimo de lucro.

A duración dos Programas de Garantía Social varían segundo as modalidades, o momento de desenvolvemento, os niveis de acceso e as expectativas do alumnado. Unha vez rematado un Programa de Garantía Social acádase unha certificación acreditativa , na que se fará constar as áreas cursadas e un resumo dos contidos de formación, as calificacións obtidas e o número de horas adicadas a cada unha delas. Esta certificación irá acompañada dunha orientación sobre o futuro académico e profesional da/o alumna/o.

Para obter máis información sobre a oferta actual de Programas de Garantía Social en Galicia pódese consultar a seguinte páxina web:

www.xunta.es/conselle/ceoug/dxoefp/sfeol/sfeol01.htm

Unha vez superado un Programa de Garantía Social as/os alumnas/os poden acceder á proba de acceso ós Ciclos Formativos de Grao Medio, ás probas para a obtención do título de Técnico Auxiliar e ás probas libres para a obtención do título de Graduado en Educación Secundaria Obrigatoria.