3.1.2.- Actividades Económicas
Segundo datos do directorio empresarial Ardán 2001, na provincia de Pontevedra están emprazadas o 35,73% das empresas de Galicia. Esto supón, en termos de ingresos de explotación, o 44,57% do total dos ingresos xerados en Galicia, situándose por riba da provincia da Coruña, que ten maior número de empresas.
O tamaño das empresas na provincia de Pontevedra é lixeiramente superior ás empresas de Lugo e Ourense e dun tamaño máis semellante ó das empresas da Coruña. De calquer xeito a maioría das empresas son de tipo PEME, xa que o 80,73% das empresas facturan entre 300.000 e 3.000.000 de Euros, presentando ingresos superiores a 3 millóns un 19,27% delas.
Respecto ós sectores de actividade, hai que destaca-la fabricación de automóbiles e carrocerías para vehículos de turismo, que se atopa localizado principalmente na provincia de Pontevedra e que xera o 99,43% do valor engadido bruto deste sector en toda Galicia e uns ingresos do 99,61%. Este sector destaca tamén como o primeiro sector en importancia en toda a Comunidade Galega.
A actividade de construcción e contratistas xerais, ocupa o segundo lugar en relación á riqueza que xera en Galicia e destaca tamén na provincia de Pontevedra tanto polos ingresos (43,84%) como polo valor engadido xerado (44,27%).
Outros sectores de grande importancia dentro da provincia son o de fabricación de conservas de pescado e os de reparación e construcción de buques, que xeran un valor engadido do 54,96% e 57,81% sobre o valor engadido total xerado en Galicia respectivamente.
Ademais, teñen unha importancia moi relevante as actividades de extracción pesqueira co 70,41% dos ingresos e o 61,35% do valor engadido do sector en Galicia, a distribución comerciante por xunto de pescados e mariscos co 67,67% e o 66,41% respectivamente e os comerciantes por xunto de materiais para construcción, hospitais e pedra traballada. Outras actividades que destacan son a de fabricación de pescados e productos do mar frescos e conxelados co 73,27% dos ingresos do sector na comunidade galega e o 72,78% do valor engadido, as tendas de comestibles e os hoteis.