I- Condicións de Emprego e Lexislación Laboral
1.1 - Acesso ó Mercado Laboral
7
1.1.1. Emprego na Administración Pública ¿Como se clasifica o persoal ó servizo da Administración? O persoal clasifícase en: Persoal funcionario de carreira É o persoal funcionario que, en virtude do seu nomeamento e baixo o principio de carreira (é dicir, ter superado un proceso selectivo de oposición) se incorpora ó servizo da Administración e ocupa prazas dotadas con orzamentos establecidos para iso. Persoal eventual É aquel que, en virtude do libre nomeamento e en réxime non permanente, ocupa un lugar de traballo considerado de confianza ou de asesoramento non reservado a persoal funcionario. A prestación destes servizos nunca se pode considerar como mérito para acceder á condición de persoal funcionario nin para a promoción interna. Este persoal estará suxeito ó dereito administrativo e o seu cesamento acórdase libremente e non xera nunca indemnización. Persoal interino É o que presta servizos de carácter transitorio. Réxese polo Dereito administrativo e ocupa prazas que están reservadas ó persoal funcionario de carreira. Un interino pode ser nomeado: a) Para cubrir transitoriamente prazas que serán ocupadas definitivamente por persoal funcionario de carreira (por exemplo, en espera de que se resolva unha convocatoria). b) Para a realización de programas estritamente temporais ou para situacións urxentes. c) Para ocupar postos de traballo en substitución de persoal funcionario que goce do dereito de reserva de praza e destino (por exemplo, unha excedencia por maternidade). O persoal interino ten que cumprir os requisitos xerais de titulación, etc. para ocupar ese posto de traballo. Perde a condición de interinidade cando xa non son necesarios os seus servizos. Persoal laboral É aquel que, en virtude dun contrato de natureza laboral (é dicir, réxense polo Dereito laboral), ocupa postos de traballo clasificados como tales. Persoal laboral non permanente Excepcionalmente, debido ó carácter temporal de determinadas tarefas ou por razóns de urxencia, a Administración pode contratar persoal laboral con carácter non permanente.