13
1.1.2. Emprego na Administración Privada
1.1.2.A. Servizo Público de Emprego de Galicia
Mediación Laboral
Obxectivos:
O Servicio Galego de Colocación, como parte do servizo público de emprego, media no mercado laboral con eficacia, transparencia e rapidez, interrelacionando oferta e demanda de emprego. Procura mellorar o funcionamento do mercado laboral galego e facilitar a igualdade de oportunidades no acceso ó emprego.
Características funcionais:
O sistema baséase na complementariedade da rede pública de oficinas de emprego e dos centros asociados para mellorar a atención a quen demanda e oferta emprego.
O modelo de mediación entre ofertas e demandas de emprego asenta na atención personalizada (evítanse as colas mediante un sistema telefónico de cita previa e os caixeiros de servizos) e na especialización do centro, que atende os usuarios só en certas familias profesionais ou sectores produtivos, normalmente vinculados á formación que realizan.
Así mesmo, o Servicio Galego de Colocación introduce a posibilidade de telematizar a busca de candidatos por parte das empresas, mediante a posibilidade de facer unha preoferta de traballo a través de Internet, e de recibir currículos dos candidatos por fax. Por outra banda, o emparellamento informatizado do SGC permite garantir que o candidato ou candidata enviado á empresa se axusta exactamente ó perfil solicitado, sen ter en conta outro obxectivo que o de gañar credibilidade para recibir máis ofertas de emprego e darlles novas oportunidades ós desempregados inscritos.
Entidades colaboradoras:
Ademais das cincuenta e unha oficinas de emprego propias, a rede de centros que colaboran coa Consellería de Asuntos Sociais, Emprego e Relacións Laborais, desempeña as seguintes funcións:
– información
– tratamento das demandas de emprego
– captación e tratamento das ofertas de emprego
– apoio á mediación entre a oferta e a demanda
O núcleo dos servizos ó emprego está constituído polo Servicio Galego de Colocación, no que se integran as antigas oficinas de emprego do INEM xa transferidas e unha rede de douscentos vinte centros asociados, integrados desde o punto de vista funcional e tecnolóxico.
Esta complementariedade apréciase especialmente na prestación de servizos engadidos ós propios de rexistro e mediación. En concreto, o Servicio Galego de Colocación desenvolve programas de orientación laboral e asesoramento para o autoemprego con vistas a mellorar a ocupabilidade dos usuarios desempregados.