Para acceder á Formación Profesional Específica de Grao Medio pódese acceder seguindo dúas vías:
- De forma directa
- Ou mediante a realización dunha proba.
- Acceso directo:
Para acceder de forma directa é necesario cumprir algún dos seguintes requisitos:
- Posuír o título de Graduada/o en Educación Secundaria Obrigatoria.
- Posuír o título de Técnica/o Auxiliar.
- Posuír o título de Técnica/o.
- Ter aprobado o 2° curso do Bacharelato Unificado Polivalente.
- Ter superado o 2° curso da Reforma das Ensinanzas Medias.
- Ter superados os tres cursos do Plan de 1963 das Ensinanzas de Artes Aplicadas e Oficios Artísticos.
- Ter superados outros estudios declarados equivalentes para efectos académicos con algún dos anteriores.
- Acceso mediante proba:
Tamén poderán acceder ós Ciclos Formativos de Grao Medio, aquelas persoas que sexan maiores de 18 anos, ou os cumpran no ano en que realicen a proba, mediante a realización e superación dunha proba de acceso.
Tamén poden acceder mediante a realización desta proba aquelas persoas que non teñan a idade pero que estean nalgún destes casos:
- Poidan acreditar alomenos 1 ano de experiencia laboral ou de inscrición como demandante de emprego.
- Teñan superado un Programa de Garantía Social.
- Teñan esgotadas as posibilidades de escolarización na Ensinanza Secundaria Obrigatoria.
As/os estranxeiras/os que desexen incorporarse á Formación Profesional Específica de Grao Medio no Sistema Educativo Español deben realizar o seguinte procedimento:
A persoa solicitante debe dirixirse á Dirección Provincial de Educación e Ciencia ou á Subdelegación do Goberno correspondente á provincia onde esté situado o centro onde pretende seguir os estudios. En calquera outro suposto as solicitudes poden presentarse na Dirección Provincial de Educación e Ciencia correspondente á provincia onde a/o solicitante fixe a súa residencia habitual ou na Subdirección Xeral de títulos, Convalidacións e Homologacións do Ministerio de Educación e Ciencia. No caso de españois residentes no estranxeiro, na Oficina Consular .
En calquera destes casos a documentación a presentar será a seguinte::
- Solicitude segundo modelo oficial.
- Certificación acreditativa da nacionalidade da/o solicitante expedida polas autoridades competentes do seu país. No caso de cidadáns da Comunidade Europea é suficiente a fotocopia do pasaporte e no caso de cidadáns españois a fotocopia compulsada do documento nacional de identidade ou da páxina do libro de familia.
- Título ou diploma oficial, do que se solicita a homologación, ou ben a certificación oficial acreditativa da superación dos exames terminais correspondentes.
- Certificación acreditativa dos cursos realizados, na que consten as materias cursadas, as calificacións obtidas e os anos académicos nos que se realizaron os cursos respectivos.
Os documentos que sexan expedidos no estranxeiro irán legalizados por vía diplomática e ademais irán acompañados da correspondente traducción ó castelán.
Unha vez presentada a documentación na Dirección Provincial de Educación e Ciencia , Subdelegación do Goberno, Oficina Consular ou Subdirección Xeral de Títulos, Convalidacións e Homologacións onde se presente a solicitude, examinarán o expediente e no caso de que falte algunha documentación ou haxa algunha irregularidade, comunicaranllo á/ó solicitante para que no prazo de dez días corrixa o erro, que no caso de non ser correxido o expediente será arquivado sen máis trámite. Este prazo pode ser ampliado ata tres meses se a documentación requerida ten que ser solicitada ó estranxeiro.
A presentación de solicitude para a convalidación de estudios estranxeiros non universitarios, dá dereito á inscrición condicional para o curso seguinte a aquel ó que se refire a convalidación. Para elo a/o solicitante recibe un volante selado cando presenta a documentación. A inscrición pasa de ser condicional a definitiva cando os expedientes son resoltos nos termos solicitados. No caso contrario a inscrición queda sen efecto así como os exames realizados como consecuencia de dita inscrición.