Como podemos observar na táboa 5.22 as empresas do sector téxtil representan o 3,89% das empresas galegas, xerando un 8,22% da facturación total en Galicia. Sen embargo, podemos ver que é unha actividade moi xeradora de riqueza xa que o seu valor engadido representa case o 21% do valor engadido total desta Comunidade.

Se analizamos a Zona Fronteiriza (Ourense e Pontevedra) observamos que nela sitúanse algo máis do 43% das empresas deste sector en Galicia, facturando arredor do 10% do total do sector galego e xerando un valor engadido de case o 65%. Debe sinalarse que dentro da Zona Fronteiriza existen diferencias entre ámbalas provincias, especialmente no que se refire ó número de empresas e valor engadido. Obsérvase claramente que mentres que na provincia de Pontevedra o número de empresas é maior, en Ourense o valor engadido xerado é moi superior. Isto débese a que a maior parte das empresas sitas en Pontevedra son distribuidoras detallistas, sen embargo é en Ourense onde se sitúan as empresas fabricantes, moito máis xeradoras de riqueza.