Na táboa 5.29 pódese observar como as empresas de Tecnoloxías da Información soamente representan o 0,84% das empresas galegas. Pódese observar que a facturación xerada neste sector supón un 0,63% da facturación total xerada en Galicia e o valor engadido un 0,98%.

Non se debe perder de vista o feito de que estes datos foron extraídos do directorio ARDAN das 10.000 primeiras empresas galegas. Isto fai que a gran maioría das empresas deste sector ó ser de reducida dimensión non estean recollidas en dito directorio. En calquera caso, o sector de Tecnoloxías da Información non é actualmente un sector significativo nin en número de empresas nin en facturación en Galicia. Aínda así, cabe destaca-las súas expectativas de crecemento e as grandes oportunidades que presenta como potencial xerador de emprego.

Polo mesmo motivo comentado anteriormente, o feito de que os datos da táboa correspondan a empresas que pola súa dimensión aparecen no directorio ARDAN, a cifra de número de empregados medio recollida na táboa non é extrapolable ó conxunto do sector.

En canto ó peso da Zona Fronteiriza (provincias de Ourense e Pontevedra) no seu conxunto en relación ó total do sector TIC en Galicia, cabe destacar que mentres que representa arredor do 39% do número de empresas do sector en Galicia, soamente xera o 17% da facturación total do sector e xera un 14% do Valor Engadido.

Debemos subliñar que se analízanse as provincias de Ourense e Pontevedra por separado existen diferencias notables, sobre todo no que refire a facturación e valor engadido xerado. Así, mentres que as empresas do sector TIC en Pontevedra representan unha porcentaxe respecto ó total galego, no que se refire a número de empresas, sete veces maior que na provincia de Ourense, a facturación e o valor engadido xerado polas empresas de Pontevedra teñen un peso relativo sobre o total de Galicia once e dezanove veces maior que as de Ourense respectivamente